【財經TOP SEARCH】冇洗米華太陽城「斷水斷糧」？

【Now財經台】截至早上11點，1小時內《彭博》用戶關注度上升最多的港股依次為中國燃氣(00384)、太陽城集團(01383)、華潤置地(01109)、新城發展(01030)、港交所(00388)。

太陽城創辦人周焯華涉嫌不法經營賭博被捕，最新係佢有意辭任旗下兩間公司太陽城及凱升控股(00102)主席，兩隻股份今日復牌暴瀉，如果周焯華真係辭任主席，兩間公司真係可以同佢劃清界線？喺中介人生意前景不明朗下，係咪唔建議撈底？

京華山一國際研究部主管彭偉新指，周焯華被捕一定會持續影響呢兩間公司，更重要係冇咗主席嘅人脈、資金，對太陽城嚟講絕對係一個沉重嘅打擊。

佢又話，太陽城主業係中介人生意，但中國政府未來一定會全力封殺，因為內地係禁賭，如果誘導內地人去澳門賭錢，喺內地法規下必定係違法，如果內地未來唔比灰色地帶中介人公司生存，會帶嚟一個非常不明朗嘅前景，相信依家嘅股價就係反映緊呢樣嘢。