【Now財經台】奧園健康(03662)今日低開後，一直冇乜起色，但午後發力向上，一度升逾8.6%，高見3.03元，收市報2.93元，升逾5%。
奧園健康上星期四同母企中國奧園(03883)出通告，指同幾個獨立第三方就可能出售物管項目進行初步討論，今日中午傳出持股超過6%嘅投資管理公司無極資本發公開信，指奧園健康現價被大幅低估，要求董事會出售項目時，要進行具透明度嘅競爭招標，以反映業務嘅真實價值。
奧園健康股價過去12個月累跌43%，無極資本都輸咗唔少，喺低位增持想溝淡，但內房氣氛持續唔好，相信短期內要翻身有難度，雖然股價今日有反彈，但要留意支持作用可以維持幾耐。
