【股市脈搏】朝雲見底未？睇實北水...

【Now財經台】聽日就上市滿8個月嘅朝雲集團(06601)，今日價量齊升，開市早段一度跌逾3.5%，但好快就掉頭倒升，仲愈升愈有，下晝一度高見4.3元，升近10%，最新繼續喺高位橫行。

朝雲股價上月底創過新低，曾低見3.54元，較招股價9.2元，「深潛」逾61%，雖然朝雲9月初納入港股通，但對股價冇乜幫助。

朝雲股價最近個幾月喺4元樓下掙扎，今日喺成交配合下，上返4元樓上 ，暫時成交股數較過去100日同時段平均增逾3倍，亦見到有唔少北水買盤。

投資者可以睇住北水動向，因為對朝雲股價係咪見底，可能有啲啟示，睇返港股通持倉紀錄，截至噚日止，北水持股僅2.86%，1個月加咗倉約1.5%。