【股市脈搏】電商聯營獲注資TOM喪挾

【Now財經台】TOM集團(02383)今朝輕微高開約2%，其後升幅一度擴大，午後升幅再度擴大，曾高見0.76元，勁升逾43%，成交股數較過去100日同時段平均激增28倍。

公司公布旗下同中郵香港嘅合營公司ULE郵樂向中郵香港配售股份，涉及1.27億美元，完成後TOM喺合營持股會由42%降至約22%。2014年郵樂成立初期做過融資，當時估值達8.3億美元，TOM股價更一度上到近3元水平，不過業績一直唔突出，通告話上年度郵樂收入8.3億元，但仲蝕緊1.71億元，綜合負債淨額仲有約2.62億元。而郵樂成立以嚟亦持續為TOM帶嚟投資虧損，中期為公司帶嚟投資虧損金額約2800萬。TOM當年出資294萬人民幣，作為郵樂部分注冊資本，亦分別提供1.55億元人民幣作為市場推廣及貨款，幾億嘅投資唔知幾時回到本，不過相信股權被攤薄唔會對業績有大影響，反而可以留意半抽身會唔會可調撥資源，或者嚟緊有冇新業務發展部署。