【公司專訪】嘉泓:建獨立倉庫同京東合作

【Now財經台】嘉泓物流(02130)上市滿1年，現價較上市價2.66元，大升逾3倍。

嘉泓前日公布，將會喺意大利為京東物流(02618)附屬京東快遞，提供海外運輸及倉儲服務，又話有「重大戰略價值」，有助意大利分公司發展成集團嘅歐洲總部及業務中心。

主席劉石佑透露，農曆新年後將設獨立倉庫跟京東合作。佢又話，嘉泓早已成為京東嘅合作夥伴，協助京東由中國到其他地區嘅空運業務。

此外，嘉泓最新公布嘅首3季營運數據，收益、毛利都錄得雙位數增長，但首3季及上季毛利率都微跌。

劉石佑解釋，呢個係行業常態，因為公司通常喺年尾同客戶簽訂來年合約，金額會喺上半年入帳，所以第3季數據會比中期略低係正常。佢又指，公司季度毛利率按年穩定增長，並期望今年第4季毛利率可以維持喺18%以上。