【Now財經台】上海復旦(01385)噚日收市後發盈喜，帶動股價今朝裂口高開，以暫時高位高開近13%，衝上逾1個月高位，其後升幅略為收窄，成交股數較過去100日同時段平均增逾3倍。
摩根士丹利喺復旦發咗盈喜後，隨即出咗份短評唱好復旦，包括話第4季係公司傳統銷售旺季，有信心復旦業務年底前可維持強勁勢頭。
復旦發盈喜後又有大摩「加持」，帶動股價今朝一舉升穿50天線，即22.65元水平，係兩個月以嚟首次，但之後又企唔穩，復旦兩日後就會正式出季績，要留意管理層對公司嘅前景睇法，係咪好似大行預期一樣咁樂觀。
