【股市脈搏】醫脈通$40好難企得穩

【Now財經台】後日就上市滿3個月嘅SaaS股醫脈通(02192)，噚日收市後公布，用約1億人仔收購一間總部於北京嘅醫學學術會議SaaS解決方案平台「美迪康信息諮詢」60%股權，集團話，今次收購可以攞到美迪康嘅客戶群、平台嘅醫療相關內容，提升醫療會議服務能力。

醫脈通股價今日逆市升，除咗升穿10天線，即37.5元水平，更一度衝上40.8元上市新高，值得留意係，醫脈通曾經多次受制於40元關口，雖然今日一度衝破呢個位，但只係曇花一現，40元關口始終企唔穩。