【專家分析】唔好高追呢兩個板塊

【Now財經台】因為疫情引起嘅供應鏈中斷問題畀市場炒足成年，新能源、芯片板塊都升唔少。

摩根士丹利有份報告都睇得幾正面，認為疫情只係暫時令供應鏈中斷，而供應短缺可以推動新能源、芯片行業，加大投資或資本開支(CAPEX)，以應對長遠發展。

大摩話，亞洲區內仲係用石油為主，即係業務仍有發展空間，又指已經見到啲芯片廠已加大緊CAPEX。

耀才證券研究部總監植耀輝認同，呢兩個行業「有危有機」，中長線投資同需求都會上升，但佢認為，芯片問題未必咁快斷尾，之前市傳第3季情況會好轉，但依家已經踏入第4季，缺芯問題仍然喺度。

至於呢兩個板塊係咪值得投資，Stanley就話，好多股份喺1年之間升咗唔少，例如中廣核新能源(01811)就爆升7.7倍，佢認為無謂高追。