【股市脈搏】一個消息炒起愛康醫療

【Now財經台】國家組織人工關節集中帶量採購，今日下午喺天津開標，下午見內地媒體陸續有競標報道，雖然暫時未肯定中標名單，但中港醫療器械股午後齊齊炒起，睇返股價反應，市場似乎認定愛康醫療(01789)係最大贏家。

愛康醫療今朝一度跌3%，午後買盤湧現，股價即刻爆上，勁升逾30%，最高10.36元，暫時成交金額逾3億元，成交量較過去100日同時段平均成交增4倍。

今年6月宣布第2輪帶量採購會集中喺關節產品，消息一出，愛康股價即爆上，但好快落返7.52元嘅逾年半低位，今日再因為帶量採購消息大升，一度升穿50天線，即10.1元水平，但其後升幅收窄，50天線得而復失。