【股市脈搏】炒僑雄唔好跟車太貼

【Now新聞台】僑雄國際(00381)係今日5大升幅股份之一，全日維持雙位數升幅。

僑雄今朝高開14%後，升勢持續，午後升幅進一步擴大，最多勁升逾48%，高見0.095元，主動買盤超過70%，收市報0.093元，升逾45%，成交股數較過去100日同時段平均大增15倍，亦係近年最多嘅一個交易日。

僑雄全日守住喺升幅榜前列位置，全因公司今朝一口氣出咗2份諒解備忘錄通告炒起股價，包括有意收購連鎖中醫業務股權，又話會同維聖實業成立合資公司，搞電子商務、軟件開發等。

僑雄技術上開始超買，14天RSI已經超過75，投資者要小心股價快上快落，炒呢啲財技股又謹記唔好跟車太貼。