【股市脈搏】搭毛記順風車小心呢個風險

【Now財經台】個別本地媒體股今日爆升，經營網上媒體及廣告業務嘅毛記葵涌(01716)是升幅第2大港股。

毛記股價今日高開逾13%後，升幅不斷擴大，午後一度飆逾1.8倍，高見1.85元，衝上8個月高位，收市仍逾倍，報1.36元。毛記平日成交唔多，但今日價量齊升，成交股數較過去100日同時段平均激增479倍。

截止下午3時55分，成交股數逾2.4億股，換手率高達2.7倍，十分誇張。

毛記近日成為城中焦點，因為旗下藝人喺觀塘海濱音樂噴泉嬉水區「沖涼」，康文署話唔排除向有關人士採取法律行動，追究責任。

雖然毛記今日喪炒，但市值仍然唔夠4億元，同上市當日曾超過17億元，仲差好遠。

值得留意係，毛記升幅午後縮得好快，同埋舊年8月股價炒高時，警方嘅商罪科都有跟進調查，所以今次想跟炒毛記都要小心風險。