【股市脈搏】呢隻舊經濟股大翻身

【Now財經台】天虹紡織(02678)上星期五收市後出咗業績，舊年少賺41%，但表現好過盈警，今朝輕微低開後，好快就掉頭向上，一度升逾19%，高見13.36元，之後升幅略為收窄，成交金額較過去100日同時段平均增9倍。

天虹紡織係港股通股份，放完農曆新年長假後，北水回歸當日，股價曾衝上14.56元嘅上市新高，2月尾發完盈警就回落到10元水平，依家MACD快線喺牛區，好快就升穿慢線，近排資金翻兜價值股，要留意天虹紡織可唔可以趁勢破頂。