我的股票

    名稱 現價 升跌

    資料報價延遲十五分鐘

    標籤: 分析01367

    【股市脈搏】廣州基金國際面臨停牌 股價插水

    【分析】 2020/04/27 17:29

    【Now財經台】廣州基金國際控股(01367)昨晚出通告,表示接獲聯交所喺星期五通知,集團未能進行足夠程度業務運作,及持有足夠價值資產支持營運,以保證股份維持上市地位。聯交所將會根據上市規則暫停集團股份買賣,集團可以喺五月七日前提出覆核,否則就要停牌,停牌滿18個月,更加要進入除牌階段。

    公司股價今朝低開26%,早段跌幅一度收窄到13%,不過沽壓喺下晝先湧現,將股價推低,最多跌48%,低見0.43元,收市跌幅稍為收窄,收報0.55元。股價今日跌至2015年七月以來嘅低位,RSI亦都跌至25水平。

    廣州基金國際前身為恒寶企業,喺2017年底宣布改名。大股東黎亮持股36%,而第二代股東就係廣州市人民政府,持有29%。但以業務嚟講,公司又唔算係政府嘅窗口公司。

    集團主要從事成衣貿易,金融服務,放債及證券投資。而成衣業務佔咗最大收入來源,佔72%。放債業務只係得26%。公司舊年收入按年跌53%,只係得6433萬,虧損擴大至1.11億,現金僅有2310萬,按年減少42%,但借貸就有2.5億,現時市值其實都唔夠2.3億。

    廣州基金國際已經唔係第一次畀監管機構警告。曾經喺2018年初,被證監會指股權高度集中。公司今次所謂沒有足夠業務或者現金問題,其實喺改名之前已經存在,不過每次都成功化解,股價亦都跟住急彈,不過投資者要成功捕捉亦都唔容易。而近年彈完後股價亦都繼續尋底,似乎難度太高,投資者要諗諗值唔值搏。

    想睇更多財經消息

    相關股票