我的股票

    名稱 現價 升跌

    資料報價延遲十五分鐘

    標籤: 地產

    【蝸居百科】過年前大掃除有方法

    【地產】 2018/02/11 11:41

    【now.com地產】「年廿八,洗邋遢」,唔好以為大掃除一日攪掂,否則身心俱疲。

    時間有數得計,抹晒全屋窗門,約一個鐘;清潔廚房、廁所,約三個鐘;客廳同房,掃地吸塵,仲要將床下底、櫃底啲雜物搬出打掃,起碼又大約三個鐘;最攞命係要諗下邊啲衣服雜物要拋棄,邊啲要留返出年用,都可以諗你一日、半日。

    所以,我建議大家要用兩至三日嘅時,嚟完成依個一年一度嘅大掃除行動。

    決定大掃除前一日:預備用品。買齊各種大掃除用品,掃把、地拖、吸塵機載塵袋、口罩、手套,同埋各種清潔劑,應有盡有,一應俱全。

    第一日:拋棄舊物。如果你只係決定要掉嘢,結果就只會揼走好少嘢走;所以你應該調返轉,諗定要留低啲乜,咁七、八成嘅多餘舊物都可以揼走。

    第二日:按序清潔。先抹窗,因為乾淨嘅窗,無話三、五日就污糟。然後清潔廚房、廁所,因為人停留喺嗰度嘅原因,係身體需要,佔同時間短,唔會停留。跟著清潔房間,因為房間係自已享受嘅私人空間。客廳係過年招呼親朋戚友嘅地方,排到最後清潔,將蝸居最佳面目呈獻。

    第三日:休息欣賞。勞碌咗幾日,成間蝸居光潔如新!開返支紅酒,坐喺梳化,欣賞一下。然後開開心心咁過新年!

    呢個週末就係農曆新年前嘅最後一個週末,大家可以按照上面嘅日程表進行大掃除。祝大家狗年亨通,長久好運!

    蝸居達人邵存希

    想睇更多財經消息