【專家分析】鄧威信:「金髮女孩」繼續利好美股

【Now財經台】上周五(27日)出爐嘅美國5月個人消費支出(PCE)物價指數按月升0.1%，消費者信心指數亦升至4個月高位，帶動標指、納指及納斯達克100齊齊破頂，展望下半年，美股係咪可以保持上升動力，繼續追落後？

星展銀行(香港)豐盛私人客戶執行董事鄧威信指，雖然有唔少美國企業下調咗盈利指引，但佢認為，對比全球其他市場，美企表現仍然係最好，加上美國市場對資金進出冇限制，集資比較方便，所以美股仍然係全球資金主要配置市場。

Wilson又指，據宏觀數據顯示，美國經濟仍然係「金髮女孩經濟」(Goldilocks Economy)，即經濟增長穩定，通脹率低，經濟處於恰到好處嘅狀態，因此，即使美股下半年仍有隱憂，例如關稅暫緩期快將結束，但如果無損企業盈利，資金都會流入美股。