【專家分析】關稅戰引爆美國「內戰」？

【Now財經台】美國國際貿易法院(Court of International Trade)昨晚(28日)裁定，美國總統特朗普(Donald Trump)喺4月2日公布嘅對等關稅(Reciprocal Tariff)超越權限，禁止有關措施生效，特朗普政府最新已就呢個裁決提出上訴。金融市場即時有反應，美匯指數回升，部分避險資產如日圓及美債，都有少少沽壓。點睇法院今次裁決？關稅戰線未來會唔會轉移至政府同法院之間？

東亞銀行財富管理部首席投資策略師李振豪指，依家美國內部分裂、鬥爭，若參考當地民調，特朗普支持度介乎42%至45%，一旦跌穿40%，相信呢啲拖後腿情況，甚至法院拖住佢嘅機率係愈來愈大，最後係咪告贏其實唔重要，只要拖到2026年5月美國中期選舉，特朗普就有機會輸，如果中期大選佢輸咗一院，之後任期內嘅施政就冇咁順暢。

佢又指，依家不論民主黨或地方法院，只要拖住特朗普後腿就完成咗，喺呢個情況下，有啲國際貿易有機會延後，但特朗普會有好多招數，所以對投資者嚟講，分散投資，做好資產配置最重要。