【專家分析】Nvidia今晚勢交靚績 霸主位難動搖

【Now財經台】人工智能(AI)晶片巨企英偉達(Nvidia)，將會喺美股今日(28日)收市後出業績，Nvidia股價由4月7日低位回升，至今累計反彈近60%。市場估計，上季收入按年增長會放慢至66%，每股盈利約93美仙，繼續保持增長。Nvidia呢份業績要留意邊啲數據？業績後股價又會點行？

南華金融集團副總裁莫灝楠指，Nvidia嘅定單已排到2027年至2028年，需求一直增加，市場對晶片運算速度嘅要求只會愈嚟愈高，唔會因為DeepSeek嘅出現令各大廠商削減成本。佢估計，Nvidia將會交出一份亮麗嘅業績。

Casper又話，晶片持續推陳出新，短期而言，Nvidia嘅晶片霸主地位好難被動搖，長遠就要留意2027年之後晶片需求仲會唔會增加，同埋有冇更勁嘅晶片面世。

股價方面，莫灝楠話，股價喺放榜後回調係好正常，但落到前低位100美元樓下機會好微。