【全球搶爆炒到癲】Starbucks一個小熊杯炒起股價？

【now.com財經】Starbucks喺每年11月都會推出限量產品迎聖誕，今年都唔例外，一隻玻璃小熊杯(Starbucks Bearista Glass Cup)上周四(6日)喺全美及加拿大多倫多Starbucks門市開售即被秒殺，更喺全球爆發搶球潮，二手市場炒價比原價高出10幾倍。

小熊杯官方售價29.95美元，折合約233港元，小熊杯開賣當日喺拍賣網eBay有人以150美元至400美元放售，個別更索價500美元，折合3900港元。此外，喺Facebook Marketplace等平台，轉售價200加元起跳，最癲叫價850元以上。

有美國及加拿大買唔到小熊杯嘅消費者，狠批Starbucks銷售安排，指部分分店貨量少得驚人，只得1至2個，又唔明點解不設限購，令貨源相對多嘅分店出現「狂掃攞去炒」嘅情況。

小熊杯點解咁吸引？因為杯身係透明，加入唔同顔色嘅飲品後，例如Peppermint Mocha、Caramel Brulee Latte、Eggnog Latte，透明熊仔就成綠色、啡色及黃色，造型可愛，有消費者更形容有一種治癒嘅感覺。

Starbucks美國股價喺小熊杯開售後，唔夠一個星期累升逾8%。