【環球金融快線】執聯合健康特價貨等反彈

【Now財經台】聯合健康(UnitedHealth Group Inc.)上周遭受雙重打擊，《大而美法案》削減咗醫療開支，同時卻刪除咗限制州政府向醫療機構徵稅嘅條款。

聯合健康昨日(7日)股價繼續偏軟，而年初至今累計跌幅更近40%，展望下半年，聯合健康仲有冇反彈潛力？

獨立市場策略師陳俊文相信，聯合健康消息多之餘，更重要係股價已自高位回落逾50%，所以好大機會出現反彈。佢又話，行業近年面對種種困難，例如醫療成本上升、受法律條款限制，不過，聯合健康及同業都指出，《大而美法案》獲得通過對前景冇太大衝擊，佢認為，依家市場對聯合健康睇得太淡，可能同近期股價插水有關。

Norman續指，聯合健康市盈率(PE)逾14倍係偏低，如果做返好賠償率及成本控制，PE有機會上返18倍水平，又認為股價有唔少反彈空間，值得留意。