【期匯決算】油價暫時先睇60美元

【Now財經台】美國4月公布關稅政策後，引爆全球經濟憂慮，油價應聲急挫，今年以來累跌近10%，低位一度失守每桶55美元水平，4月至5月就喺55美元至63美元橫行，其後以伊戰事爆發，刺激油價一度迫近80美元關口，但隨著雙方達成停火協議，油價好快落返65美元水平，加上石油出口國組織及盟友(OPEC+)6月開始增產，8個OPEC+主要成員國，已連續3個月每日增產41.1萬桶，OPEC+將會喺7月6日開會傾8月產量。

獨立外匯商品分析師譚家康指，油價今年主要受供求影響，估計下月開會後將繼續增產，油價勢受壓。早前，伊朗威脅封鎖霍爾木茲海峽(Strait of Hormuz)，刺激油價短暫抽升，另一方面，唔排除有OPEC+成員國產量比協議更多，預期油價會面臨較大下行壓力，暫時可以先睇60美元水平，如果企唔穩，要再下試58美元水平，相信下半年供求因素會繼續左右油價走向。