【FINTERVIEW】 日韓股市繼續是AI浪潮贏家(下)

【Now財經台】第1季已進入尾聲，亞太區股市原本表現幾好，但爆發中東戰事後，市場波動性大幅加劇，其中，日本股市今年升幅已唔見咗一截，與此同時，雖然日本上月核心通脹率放緩至2%以下，但市場預期喺戰事推高能源價格，同埋工會爭取加薪逾5%嘅背景下，當地通脹及加息壓力或同步升溫，點睇亞太區股市嘅發展？

滙豐私人銀行及財富管理北亞首席投資總監何偉華指，仍睇好整體亞太區股市前景，尤其係日本及南韓，雖然依家市場比較波動，但呢兩個市場今年以嚟仍錄得唔錯嘅升幅，加上基本面穩健，亦受惠於人工智能(AI)及科技浪潮相關股造好。

佢續指，日韓都積極推行企業管治改善措施，希望帶動公司盈利及股東回報率，面對油價波動，兩國擁有較充足嘅石油儲備，抵禦石油價格衝擊嘅能力較高。

Patrick又話，日本有較好基本因素，喺「春鬥」方面，市場預期工資增速會喺經濟好轉時同步加快，當實質工資上升時，或可帶動消費增加，對企業盈利反而有正面作用。

佢補充，日本喺全球嚟講利率相對低啲，加息喺市場預期之內，加上已講咗一段時間，喺利率回升嘅可能性下，日本資產或更具吸引力。