【FINTERVIEW】中美貿戰陰霾下資源股睇高一線(下)

【Now財經台】中美關係突急轉直下，事緣中國上周四(9日)突然宣布加強稀土出口管制，美國總統特朗普(Donald Trump)隨即反擊，威脅會喺11月1日起向中國貨品加徵100%關稅，美股上周五(10日)經歷「黑色星期五」大冧外，加密貨幣(Cryptocurrency)大爆倉，「一哥」比特幣(Bitcoin)急瀉，插穿11萬美元關口，市場憧憬10月31日起一連兩日嘅亞太經濟合作組織(APEC)峰會，可能會為中美談判帶來新進展，點睇美股後市？

富達國際投資策略董事簡立恆指，關稅寬限期完結前，市場仍有時間消化相關消息，要留意APEC峰會前會唔會再傳出新消息，不過，特朗普態度冇之前咁強硬，相信中美仍有磋商空間，始終中美經濟有好大關聯性，如果脫鈎對任何一方嘅經濟都冇好處，因此，市場中美最終可以傾掂數仍抱有希望。

Terrence又話，中國掌握全球大部分稀土開採及提煉，係非常有用嘅「談判籌碼」，雖然出口設限，但稀土開發需求大，相信出口限制唔會有太大影響，資源股暫時仍值得睇高一線。