【FINTERVIEW】洪灝:港股上望空間大唔使太保守(上)

【Now財經台】港股沉咗兩日，依家喺高位有阻力，恒生指數今早(18日)發力，高開逾200點，其後升幅擴大，重上24800點水平，短期係咪會持續強勢？有冇向上突破嘅催化劑？

蓮華資產管理公司管理合夥人洪灝認為，港股短線向上空間仍好大，投資者唔需要因為依家嘅波動就放棄，今輪升勢同上次唔同，資金流動性有好大改善，加上近期有重要會議，會討論唔少重點政策，對投資者情緒亦有幫助，所以現階段唔建議投資者太保守。

佢又話，恒指突破25000點可以話已經冇懸念，雖然遇到阻力，但仍有上升空間，因為市場依家等緊新政策出台，房地產市場仍然麻麻，加上第1輪刺激消費措施完咗，如果情況持續，下半年數據又會再放緩。

洪灝續指，政府係願意聽取市場意見，睇返消費數據，而比較好嘅必需品板塊，例如茶飲股、金飾股已初見成效，喺結構上幫到手，相信為咗避免「內捲」，政府會繼續推出新補貼政策。