【10秒生成短影音】OpenAI出新App硬撼TikTok、Meta？

【now.com財經】Google及Meta等最top人工智能(AI)平台不斷加快創新，「AI+社群影音」成為今年最矚目戰場，OpenAI亦加入AI短影音大戰，推出「新武器」打呢場硬仗，而其中一個對手Meta最近都推出名叫Vibes嘅AI Video Feed 。

OpenAI日前推出用Sora 2.0模型驅動嘅新社交App，主攻全AI生成內容，操作介面會類似TikTok，呢個App最特別之處係所有影片都係AI生成，只需輸入好簡短嘅指令，就可以快速創作出一條約10秒嘅短影音，依家會先喺iOS推出，未來有機會Android都有得玩。

此外，用戶又可以自創非常迫真嘅AI化身、聲音，經許可後可以用喺自己或朋友製作嘅影片裡面。值得留意係，Sora 2.0暫時只支援純AI生成內容，用戶唔可以upload用自己手機影嘅相或影片。

有分析估計，OpenAI呢個「新武器」有機會幫公司開拓新廣告收入來源，亦可以提升集團喺技術方面嘅知名度。