【又傳字節跳動來港上市】抖音總裁:有人想用假消息賺返筆

【now.com財經】TikTok美國業務「不賣即禁」事件已糾纏咗一段長時間，特朗普(Donald Trump)政府一再延長「死線」，直至近期出售TikTok美國業務有明顯進展，相信母公司字節跳動(ByteDance)已經一頭煙，最新又傳出另一個傳聞，搞到公司高層要急急澄清。

話說近日網上再度流傳字節跳動準備嚟香港掛牌嘅消息，又話呢個消息係來自《路透》，字節跳動旗下抖音副總裁李亮好快就「出聲」澄清。

李亮除咗闢謠，仲話唔排除有人想利用呢個假消息炒作「字節概念股」賺返筆，佢又指，其實市場上唔少所謂「字節概念股」嘅訊息都係失實，呼籲散戶小心。

其實今次已經唔係第1次傳字節跳動嚟香港上市，早喺2021年已經傳過，當時話公司估值近4000億美元，折合逾3萬億港元，但集團好快已經否認，而去年底《路透》曾引述消息指，字節跳動暫時冇上市計劃。