【Threads爆紅賣斷市】一個小小盲盒相機打救財困Kodak？

【now.com財經】有逾130年歷史嘅國際攝影器材企業柯達(Kodak)上月出第2季業績時指，現時已經冇落實嘅融資渠道，或可以動用嘅流動資金，去償還就快到期約5億美元債務，甚至話集團可能冇辦法再經營落去，拖累Kodak股價(KODK.US)當日急瀉近20%。不過，一個小小嘅盲盒可能成為公司嘅「救星」。

最近Kodak同一個攝影品牌聯手推出1款超迷你，真係可以影相嘅相機Kodak Charmera，size只有掌心咁大，集團授權一家香港公司以盲盒形式推出，有幾個唔同顏色、設計，由於size夠細，變身成一個「Keychain Camera」及潮物，更重要係食正泡泡瑪特(09992)引爆嘅盲盒熱，帶挈產品喺社交媒體爆紅賣到斷市，令Kodak成為另一個「盲盒經濟」大贏家。

Kodak Charmera唔係sell畫質及專業，但仍然一機難求，因為Kodak將「影相」重新定義為「輕微娛樂體驗」，同埋睇準盲盒經濟嘅威力，令呢款影像帶少少粗糙「唔完美」嘅迷你相機變身「吸金王」，未來要留意Kodak業績會唔會有改善之餘，甚至可唔可帶領公司走出困局。

Kodak Charmera喺香港都可以買到，但開售當日已畀人搶晒，後來就要限購，到今日(12日)中午發售嘅公司喺官網公布「暫時已全線售罄」，而喺網上二手平台「身價」最新已炒高逾2.6倍。