【ACGHK明日開鑼】動漫電玩「玩」出龐大經濟效益

【now.com財經】本港其中一項年度盛事，香港動漫電玩節(ACGHK)明日(25日)開鑼，橫跨動漫、電玩、潮玩及同人創作4大領域，展位超過780個，規模係歷年最大。動漫迷要特別留意，今年新增「香港世界同人祭2025」，有來自日本、南韓及歐美等約80個國際攤位參展。

動漫電玩節除咗場內氣氛熱爆，場外唔少玩具店都可以受惠，以去年為例，場外玩具店人流多咗近30%，當中唔少係來自內地嘅「尋寶客」。

有業界人士指，本港玩具市場每年規模高達數十億元，更重要係，動漫電玩市場唔太受經濟大環境影響，而本港玩具市場具備多元化發展嘅機會及優勢，前景相當唔錯。

此外，「動漫Cosplay大賽」係每年ACGHK「主角」之一，除咗打卡，當中嘅經濟效益相當龐大，有日本數據顯示，全球角色扮演服裝市場規模，將會由去年52億美元，升至2030年約76億美元。

除咗係個人喜好，Cosplay引伸出嚟嘅產業鏈，涉及道具製作、攝影、Social Media內容創作及服裝設計等，可以提供大量就業及創業機會，為整體經濟注入唔少動力及實際貢獻。

事實上，財爺喺今年2月曾經提及，動漫電玩係香港創意產業重要一環，部分「土炮」創意出色，有力揚威海外打入外國市場，並指近年更有唔少年輕人將喜好轉化成個人事業，幫手推動產業發展。