【IP經濟】Labubu由潮物變「老Best」唔易？

【now.com財經】泡泡瑪特(09992)旗下「皇牌IP」Labubu，被南韓超級女團BLACKPINK嘅Lisa「抱」上神壇，呢股熱潮席捲全球，但近日Lisa「換畫」，隨即惹嚟Labubu熱潮好快就會消退嘅揣測。

近日網上出現一個小小嘅「民調」，其中1條問題係「你或你身邊的女性是否知道甚麼是Labubu？」，結果顯示有逾93%人「知道」，另一條問題係「你身邊的女性是否喜歡Labubu？」，結果顯示有逾43%「不喜歡」，有逾56% 「喜歡」，反映唔喜歡嘅佔比唔細。

其實要由一個潮物轉化成一個長青品牌絕對唔容易，成功率亦偏低，Labubu除咗面對商業風險，更要面對政策風險，例如內地早前曾指有需要考慮加強盲盒規管，雖然冇點名任何公司，但投資市場隨即有反應，泡泡瑪特股價應聲下挫。

【3大「失寵」徵兆？】

1.山寨版通街賣，有傳部分老翻同正版係來自相同生產商，而部分「貴價A貨」質素甚至好過正版，加上泡泡瑪特嘅「飢餓行銷」手法一直被真正用家批評，甚至有人因為咁而「脫坑」。

2.泡泡瑪特股價過去1個月累跌約4%，一度跌至240元邊緣，勢頭明顯轉弱。

3.雖然Labubu最新《怪味便利店》系列仍掀起炒風，但同以往相比，明顯冇咁「襟炒」，炒價急速回落，部分產品即使未變蟹貨，但已經有價冇市。

 到底Labubu最後會唔會「跌落神壇」，相信短期仍未有答案，起碼唔少大行依家仍撐泡泡瑪特，目標價仲睇緊3字頭。