【「新股王」命脈？】Labubu不能輸！？

【now.com.財經】官媒「風向」上周五(20日)突轉，呼籲加強監管盲卡、盲盒，被視為「新股王」嘅泡泡瑪特(POP MART)(09992)，股價應聲下跌，其實公司股價近期下滑，除咗監管因素，「吸金王」Labubu二手價下滑、大媽掟貨，同埋估值貴都係「推手」。

不過，瑞銀近日發報告繼續力撐泡泡瑪特，指產品需求持續強勁，Labubu3.0依家喺二手市場仍有50%溢價，新出嘅「怪味便利店」系列熱炒，喺美國銷售嘅上一代Labubu都加咗價。

瑞銀又估計，Labubu動畫會成為股價近期催化劑，重申泡泡瑪特係內地零售股首選，目標價睇329.2元，又重申「買入」評級。

集團創始人王寧食住Labubu熱席捲全球呢個勢，成立電影工作室，將會推出《Labubu與朋友們》動畫劇集。此外，集團最新有另一個搞作，市傳公司近日招兵買馬，部署殺入小家電市場。

雖然泡泡瑪特股價近期弱勢，早前市值喺短短1周內蒸發近400億元，而股價喺過去5個交易日累跌逾5%，但過去1個月及今年以來，仍累升逾12%及1.7倍，未來要留意喺大行力撐及集團多項新計劃下，股價係咪可以扭轉近期弱勢，重拾升勢。