【世界巡唱7月開波】BLACKPINK勢炒起YG娛樂股價？

【now.com財經】上次完成超過60場《BORN PINK》世界巡迴演唱會後，曾傳出BLACKPINK可能解散嘅傳聞，最後佢哋所屬嘅YG娛樂出手打破謠言，指呢個超級女團會繼續以團體形式同公司合作，成功保住呢隻「金蛋」，但個人發展就會結束。

今年初，手上有BLACKPINK、BABYMONSTER等超級女團及組合嘅YG娛樂，突然「大地震」，宣布結束演員經理人業務，指要專注音樂事業，所以進行架構重整。YG娛樂更為BLACKPINK今年回歸及世界巡唱《DEADLINE》，成立一支專屬團隊。

《DEADLINE》會喺7月正式展開，首站係「主場」首爾，至於香港就會係呢個world tour最後一站，將會喺2026年1月24日及1月25日，在啟德主場館開Show。

BLACKPINK呢個世界巡唱好大機會又成為YG娛樂股價催化劑，睇返公司股價表現，過去5年、1年及今年以來，分別累升逾1.7倍、逾80%及逾80%，事實上，BLACKPINK「一舉一動」都對YG娛樂股價有好大影響力，當日BLACKPINK續約問題一直傾唔掂，YG娛樂股價應聲插水，預期BLACKPINK世界巡唱7月展開時，YG娛樂股價勢出現新一波炒作，股價今早(28日)偏軟，最新微跌0.2%，報80800韓圜。

其實依家要喺香港買賣南韓股票都好方便，部分證券行早已有相關服務。