【槓桿致勝】造淡美團宜小注

【Now財經台】美團(03690)股價上周見咗近10個月低位115.8元後反彈，計埋今朝(15日)暫時已連升第3個交易日，今早一度升逾3%，高見125.2元，升穿10天線。美團積弱咗一段時間後，終於有好轉跡象，但外賣戰未有降溫跡象之餘，仲似乎不斷升級，依家應該追好倉定造淡？

胤源世創家族辦公室(香港)第一副總裁黃偉豪建議投資者先觀望，由於美團股價近日跌咗唔少，加上恒生指數今早升至24500點，市場會追入近日較落後嘅股份，令美團股價有反彈。宏觀面而言，如果外賣戰持續，估計美團反彈幅度唔會太大，所以依家造好倉部署似乎太進取。

至於睇淡美團前景嘅投資者，Ravi建議可以考慮造淡，但仍需觀望，例如股價喺125至126元有阻力，宜小注部署淡倉。