【Now財經台】過往分析住宅樓市，通常會睇藍籌屋苑交投及價格，例如太古城、美孚新邨等，不過，近年隨著內地及年輕的新購買力出現，新興住宅區亦開始受關注，二手註冊量更開始逆轉，「十大新社區」由邊啲地區組成？最新市況係點？
美聯物業分析師岑頌謙表示，因為新屋苑規模唔及傳統屋苑，所以用社區概念劃分，「十大新社區」遍布港九新界，包括元朗站、大圍、啟德及黃竹坑等，涉及逾70個屋苑，每個屋苑最少有300個單位，同埋都係2001年後才落成入伙，依家「十大新社區」有約9200個單位，但隨著區內更多新屋苑落成，Benny估計，未來將會有約9.6萬個單位，直迫傳統藍籌屋苑嘅9.9萬伙。
二手交投方面，2024年傳統屋苑二手註冊量仍高「十大新社區」約6%，但自去年開始，「十大新社區」二手註冊量反超逾10%，金額更高出50%。
Benny又話，「十大新社區」最大優勝之處係樓齡淺，平均樓齡僅8年，遠低於平均樓齡逾40年嘅傳統屋苑。岑頌謙又話，新興住宅社區嘅領先程度會愈嚟愈明顯，跑贏傳統屋苑之餘，更會成為常態，而喺二手成交量不斷上升下，亦會為呎價提供上升動力。
