【專家分析】勿All-in美股AI巨無霸IPO？

【Now財經台】美股3大指數昨晚(14日)高收，其中，道指重上50000關，標指及納指又破頂，主要受惠於中美會面氣氛良好，人工智能(AI)概念股持續強勢，加上今年美國最大型IPO、AI晶片大廠Cerebras首掛表現亮眼，SpaceX及OpenAI等科技巨無霸亦排緊隊上市，點睇美股後市，有冇出現見頂訊號？

艾德金融投資執行董事文錦輝表示，喺現時嘅市場氣氛下，美股應該暫時唔會轉勢，亦未見到見頂訊號，不過，投資者仍要小心，暫不宜好似上半年咁進取。雖然市場將迎來巨無霸IPO，不妨順勢擁抱呢股熾熱氣氛，但須慎防大市衝高後突然掉頭回落，因為大市急挫前好少會出現明顯嘅預警。

文錦Sir又話，如果美股可以進一步推高，加上市場對減息嘅預期，呢啲宏觀因素都可以支撐大市氣氛，因此，就算有多隻巨無霸籌備上市，美股亦未必會即時見頂回落。不過，佢建議投資者喺呢啲巨企登場前，適度調整倉位，切忌全倉押注，最好預留三分之一現金，一旦大市回調仍有充裕嘅資金趁低吸納。