【專家分析】金價愈升愈癲怕唔怕「起泡」？

【Now財經台】環球局勢不明朗因素多，令金價不斷衝高及破頂，今朝(29日)又創新高，突破每盎司5500美元，暫時已連升9日，累升近20%，今年以嚟就累升27%，真係升得好急，擔唔擔心會有泡沫？

艾德金融投資執行董事文錦輝指，依家個金市真係令人摸不著頭腦，美元跌咗落嚟金價係有著數，聯儲局未來亦有機會加息，更重要係，依家各國擔心自己嘅貨幣貶值，就爭相買入黃金增加儲備，大幅推高金價。

佢又話，金價前幾日衝咗上去，技術上出現咗1支「避雷針」，之後再畀一啲盤頂咗上去，曾高見5588美元，之後落返5400美元又出現1支「避雷針」，投資者真係要小心。Felix認為，如果想搵個靚位買金，現水平高追真係有風險，可以等回返200美元至300美元再買入，始終地緣政局仍會令資金繼續泊入貴金屬。