【專家分析】買英矽智能等過咗禁售期再諗？

【Now財經台】英矽智能(03696)上周五(8日)宣布同Google Cloud合作，旗下生成式人工智能(AI)平台Pharma.AI，將利用Google運算基礎措施，以及Gemini模型加快藥物研發流程，係咪利好股價嘅正面消息？

高歌證券金融首席分析師聶振邦表示，英矽智能早前發布智能實驗室系統Lab Claw，呢啲智能體需要強大嘅AI大模型配合先可以發揮效用，目前睇嚟同Gemini搭配嘅機會好高，因此，今次合作一定可以加快研發新藥嘅效益，喺科技層面上有助拉開同競爭對手嘅差距。

不過，佢強調，集團臨床實驗及藥物發現成果消息，對股價嘅刺激作用，會比AI合作消息更大，後續單靠AI消息未必可以對股價帶嚟強大支持。

聶Sir又話，長遠而言，管線開發對公司前景屬於利好，但需時發展，目前，英矽智能需要喺收益與前景之間取得平衡，相信今、明兩年會較多同其他藥廠喺代工方面探索合作，以提升收入，藥物發現就作為帶動力。

投資部署方面，佢建議留意未來一兩周，股價可唔可以上到70元及企穩，如果可以，就可以上望75元，中長線而言，建議過咗主要股東及基石投資者禁售期，等股價回落至60元樓下再做部署。