【名家給力場】等SpaceX上市後回調再買貨？(下)

【Now財經台】全球首富馬斯克(Elon Musk)旗下SpaceX，今晚(12日)就會登陸納斯達克，呢個史上最大嘅世紀IPO集資額高達750億美元，雖然市場質疑集團估值太貴，睇返以往嘅明星股上市首年，股價都自高位大幅回調幾成，如果散戶想喺上市後買貨，應該點部署？

勝利證券首席顧問陳建良指，有分析指，買SpaceX就好似10幾年前買比特幣(Bitcoin)，一係輸晒，一係升幾百倍，以往嘅明星股上市後跌得比較多，係因為之後出現咗明顯競爭對手，甚至替代公司，KL估計，SpaceX上市首日股價好大機會升，但由於市值大，唔會一開市就倍倍聲咁升，加上太空概念進入門檻好高，市場上暫時搵唔到第2隻同類股份替代，佢預期，SpaceX之後好大機會可以發展到好似人工智能(AI)般大嘅概念，所以唔使太擔心，但就要留意呢類股份好易受個別事件影響。

KL又話，傾向等股價回調之後再買貨，因為上市首日一般都會出現雙位數波幅，投資者情緒好易受影響，如果有擔心，就可以等出咗衍生產品再參與，但相信依家太空相關交易所買賣基金(ETF)，已經喺私人市場慢慢吸納SpaceX，散戶唔需要等SpaceX入指數，應該都會有被動投資者，有封閉性基金(Closed-end Fund)同埋太空相關嘅ETF成為被動買盤。