【Now財經台】星展銀行上月斥資26.19億元，掃中環中心6層寫字樓自用，涉及總建築面積15萬平方呎，呎價1.72萬元，更成為今年最大商廈大Deal，成交呎價係咪屬於市價水平？
中原(工商舖)寫字樓部高級資深分區營業董事謝立生指，中環係香港核心商業區，吸引唔少銀行、股票、證券、基金等金融企業進駐，佢認為，星展購入嘅寫字樓總面積大，總成交額高，入手價相當理想。
佢續指，隨著香港國際金融地位進一步鞏固，跨境財富管理中心更成為全球第1，今年第1季首次公開招股(IPO)較去年同期飆6倍，呢啲因素都可以推高甲級寫字樓造價。
早前，有報告指甲級寫字樓空置率跌至9.2%，係全港唯一有改善嘅地區，點睇今年餘下時間嘅寫字樓市道？
謝立生指，對寫字樓前景都睇得比較正面，租務市場方面，超級甲級寫字樓例如IFC及The Henderson，後者已租出90%，前者空置率亦非常低，喺呢個情況下租金走勢都好樂觀，如果租金持續上調亦有承接，估計未來升幅將介乎5%至10%。
