【Now財經台】4月一手私宅登記量按月大升85%至2512宗，背後有咩重要推動力？
利嘉閣地產研究部主管陳海潮指，背後主要推動力就係整體樓市回暖，市場睇好後市，又認為「愈遲買愈貴」，更重要係2年前全面「撤辣」後，市場購買力仍未全面爆發，而年初至今開始慢慢見到爆發跡象，加上發展商積極推盤，吸引一啲大額購買力、長線投資者入市。
佢又話，量多咗總值自然上升，反映買家積極入市，除咗細價盤，亦包括一啲中價、高價物業，推高整體量值及平均價，喺價量齊升下，反映市場信心正全面恢復之中，再配合樓價喺過去14個月已累升10%，現時樓市處於一個由一手帶動嘅新上升周期。
