【Now財經台】荃灣橫窩仔街新盤首批涉及110伙，入場費約461萬元，平均折實呎價約17000元，如果參考區內之前新盤開價，映日灣約17000元，而差不多10年前嘅全城滙，呎價就約14500元，今次呢個荃灣新盤嘅呎價偏向進取，還是保守？
美聯物業助理聯席董事羅文暉表示，開價絕對係保守，相對嚟講都比較優惠，喺同區裡面都有啲水位，並相信呢個新盤會係今個月市場焦點，將會有大量買家嚟了解。
佢又話，映日灣及全城匯都係開呢個價錢，同10年前嘅開價同依家比較，呢兩個屋苑依家二手成交呎價約19000元至22000元，形瑨第1張價單開價逾17000元，較二手有逾10%至20%折讓。
至於會唔會搶走二手成交，羅文暉就話，今個月荃灣二手成交唔夠80宗，上月就有逾140宗，少咗一半，主要係買家傾向觀望新盤開價，形瑨目標買家主要係上車客及投資者，相信佢哋會等個盤開咗，真係買唔到再回流返二手市場。
