【Now財經台】「五一」黃金周好快就到，預期有近百萬內地旅客訪港，相信核心遊客區如尖沙咀、旺角等零售商舖人流、生意有望改善，估計邊啲行業會最受惠？此外，商舖空置情況有冇改善？
盛滙商舖基金創辦人李根興表示，現時舖市處於「天堂同地獄」嘅局面，四大核心區包括旺角、銅鑼灣、中環及尖沙咀處於「天堂」，人流明顯改善，不過，民生區就處於「地獄」，一旦遇上港人外遊嘅長假期，人流立即減少。佢又話，「五一」黃金周旅客以內地客為主，估計核心區消費幾十蚊以內嘅餐廳，幾百蚊以內嘅手信店會好旺場。
Edwin續指，核心區嘅商舖空置率由12%至13%，回落到介乎8%至9%，甚至預期會進一步回落到介乎6%至7%，仍有空置係因為業主企硬唔肯減租，不過，民生區如天水圍、元朗等就變成重災區，空置率可高達15%至20%，因為該區北上消費太容易，遊客又唔會去到咁遠，所以空置率會持續高企。
