【Now財經台】黃竹坑近期有唔少新盤推售，包括依家賣緊嘅黃竹坑站第6期DEEP WATER SOUTH，同埋預期上半年推出嘅海盈山4B期等，合供提供逾千個單位，買家一般都傾向等新盤，會唔會令區內二手屋苑受壓？
香港置業高級聯席董事譚浩智認為，南區方面，買家一般都傾向先等新盤，因為供應唔算好多，黃竹坑站上蓋項目The South Side共有6期，而第6期連同第4B期海盈山，仲有逾千個單位，雖然有部分買家都睇定啲再睇下投資邊一期，但一啲具前瞻性嘅買家已經入市，對區內二手屋苑係會帶嚟少少壓力，因為比較近深灣9號，甚至遠少少嘅南灣，但優勢上差距唔大，始終呢啲二手屋苑樓齡都新，買家都會有興趣，當然，買家仍會考慮年期、設施等因素。
黃竹坑指標屋苑深灣9號及「居屋王」雅濤閣，今年二手買賣及租務情況如何？譚浩智表示，呢兩個屋苑成交一向唔係太多，深灣9號今年以嚟有6宗成交，最高成交呎價超過3萬蚊，雅濤閣成交就約5宗。
