【Now財經台】本港住宅市場「供平過租」嘅情況，已經持續咗9個月，根據中原租金回報率顯示，數據已經自去年8月嘅高位，即3.6%，連續5個月回落，CRI回報率反映樓價與租金之間有乜嘢關係？點評估今年第1季租金回報率走勢？
中原地產研究部高級聯席董事楊明儀指，CRI回報率已連跌5個月，因為呢段時間租金升幅唔及樓價，去年5月本港銀行同業拆息(HIBOR)急挫後，本港樓價升得急，而新年前及聖誕假期都係租務淡季，變相升幅慢咗落嚟，佢估計，2月及3月樓價都會持續上升。
楊明儀又話，傳統租務旺季大概喺4月、5月之間出現，因此，相信第1季CRI回報率都會向下，但相信仍可守住3.3%水平。
