【now.com財經】近年被「醜鞋」(Ugly-Shoes)熱潮搶晒風頭，被潮人及年輕一族冷待嘅Nike，昨晚(12日)因一單訴訟，極速成為市場焦點，而且花生指數爆燈。
創立自家品牌CLOT嘅陳冠希(Edison Chen)，近日被Nike入稟，話佢違反合作協議，向佢索償1.26億美元，但值得留意係，外界對呢個天價索償金額有唔同講法，據最新消息指，法庭文件出現文書錯誤，索償金額應該係12.65萬美元，折合約98萬港元。
呢單消息昨晩火速喺Social Media傳播，源於@sneakerlegal喺X出po，公開咗法庭文件，列出案件編號、提告理據及索償金額，但唔見有詳細嘅違約內容。
CLOT同Nike曾經有過一段長達17年嘅合作關係，自2006年開始推出唔少cross over產品，每次有產品推出都爆搶購潮及熱炒，不過，雙方其後「分手」，陳冠希轉為同「對家」Adidias合作，雙方合作唔夠1年，Nike就向陳冠希索償。
Nike美國股價及Adidas德國股價，昨晚都冇受事件影響，齊齊有得升。
