【Now財經台】依家華爾街流行一種新玩法，投資者買入2年期呢類短期國債、再沽出10年期呢類長債，原因係押注聯儲局或因美國總統特朗普(Donald Trump)不斷施壓而跪低，加快減息步伐，較敏感嘅短債息就會跟隨下跌，刺激債價上升。不過，減息步伐太快或會推高通脹，繼而令長債息向上，壓低長債嘅債價，呢種操作有咩風險？呢種玩法有機會令國債孳息曲線「變斜」，對金融市場有咩影響？
iFast Global Markets副總裁溫鋼城表示，對聯儲局減息持觀望態度，雖然美國通脹上升，但失業率企穩4.1%，估計短期減息嘅機會唔大。佢又指，如果美國減息步伐慢，短債息有機會扯高，所以呢種買短債、沽長債嘅操作有一定風險。溫鋼城續指，現時最流行嘅策略係沽港元、買美元，因為港息更低，淨息差更可觀。
Harris補充，投資者可以透過觀察債息U型曲線(U-curve)制定策略，一旦出現「倒掛」，即短息高過長息時，即預示兩年內經濟或會倒退，以及有機會出現股災。
