【Now財經台】美國經濟數據轉差，其中，上季國內生產總值(GDP)3年以嚟首次收縮，個人消費支出(PCE)增速減至近兩年以嚟最慢，核心PCE增幅就高過預期，就業市場亦轉差。聯儲局肩負穩定就業市場及控制通脹兩大責任，主席鮑威爾(Jerome Powell)似乎較重視遏通脹，同美國總統特朗普(Donald Trump)較關注就業市場，取態明顯唔同，點睇美國經濟前景？
經濟學家洪灝指，現時聯儲局的確陷入一個較困難嘅局面，如果今年通脹落唔到，或中美談判唔順利，繼而產生重大不確定性，美股就會繼續調整，佢建議先留意美股會唔會反彈。
洪灝續指，美國上季GDP錄得負增長，係因為「對等關稅」(Reciprocal Tariff)令企業囤積存貨，導致瘋狂入口，係技術性地拉低咗GDP，佢估計，第2季都會有類似情況，因為關稅暫緩90日，期間進行嘅談判仍存在不確定性。佢又補充，就業、工時、工資增長、零售增長等「硬數據」都會顯著放緩，所以美國經濟陷入技術性衰退嘅概機會非常大，經濟前景轉差速度亦肯定會加快。
