【Now財經台】日本10年期國債孳息周二(25日)升穿1.58厘，衝上2008年10月以嚟高位，日本債息自金融海嘯以嚟不斷向下，直至2023年先開始回升，未來再升空間有幾大？
資深經濟師羅家聰指，長期國債孳息一般跟通脹掛鈎，日本核心通脹近年已升至逾3%水平，佢認為，就算日本經濟短期陷入衰退，都唔會對通脹有好大影響。羅家聰續指，日本曾銀紙任印導致日圓貶值，係日本通脹壓力比美國及其他國家大嘅其中1個原因，佢估計，日本10年期債息仍有好大上升空間。
KC又話，就算依家日本冇咗YCC(孳息曲線控制)，因為日圓喺枱底干預嘅作風冇變，日本銀行會自我審查，因此，孳息曲線唔能夠完全反映經濟增長，但佢認為，孳息曲線斜上或反映物價水平及工資所形成螺旋上升情況，日本央行或要仿傚聯儲局2年前嘅加息做法。
