【Now財經台】相對於英偉達(Nvidia)，英特爾(Intel)喺人工智能(AI)大戰中似乎處於下風，雖然一度想打入由Nvidia主導及利潤豐厚嘅AI加速器市場，但一直唔成功，為咗要打好呢場AI大戰，Intel最新宣布同集團有深厚關係，有「晶片創投教父」之稱嘅陳立武(Lip-Bu Tan)回巢，出任行政總裁，任命將會喺下周二(18日)生效。
陳立武喺晶片及軟體領域有超過20年經驗，Intel曾經喺2022年邀請佢加入董事會，希望幫公司重奪晶片製造一哥地位，但去年突然請辭，市場對佢今次回巢有好大期望，希望可以令Intel起死回生。
救唔救到Intel暫時係未知之數，但股價已即時有反應，昨晚(12日)喺美股收市後延長交易時段炒高逾10%。
