【TikTok「命運」！】Reddit創辦人加入競購團隊贏面更大？

【Now財經台】TikTok美國業績「命運」係點，最終被禁還是有新主仍然係一個問號，但事件有一啲新進展。

美國億萬富豪、美國職業棒球大聯盟(MLB)洛杉磯道奇隊前老闆Frank McCourt宣布，有「美國連登」之稱嘅Reddit聯合創辦人、風險投資者Alexis Ohanian，已經加入佢競購TikTok美國業務嘅團隊，出任專注社交媒體嘅戰略顧問。

Alexis Ohanian就話，對參與呢個項目感到興奮，又話希望最終可以令美國人對自己嘅數據有更多控制權。