【Now財經台】「股神」巴菲特(Warren Buffett)老拍檔兼「軍師」、投資旗艦巴郡(Berkshire Hathaway)副主席芒格(Charlie Munger)逝世，巴菲特亦形容自己都打緊「加時賽」，巴郡係咪會進入「冇芒格、巴菲特隨時離開」嘅時代？若巴郡失去呢兩位靈魂人物，呢隻重量級投資旗艦會何去何從？
資深經濟師羅家聰認為，巴菲特及芒格明顯係一個精神領袖作用，始終年紀真係好大，相信唔少日常運作已經常規化，只要投資哲學冇變，相信對巴郡嘅運作及前景都冇太大影響。
至於巴郡未來嘅發展，KC指出，留意到近年巴郡好多投資都係買咗冇幾耐就賣返出去，會唔會係依家眼冇咁準？其實巴菲特都承認有時因為佢個人唔鍾意就唔投資，因而蝕底咗，佢認為，巴菲特年紀大咗對巴郡嚟講都有啲阻力，雖然佢係一個Icon，但如果抗拒新事物就變成阻力，因此，如果畀新人接棒都係一件好事。
