【Now財經台】油價近日喺低位徘徊，沙特阿拉伯及俄羅斯重申，自願減產會持續至年底，但其實都唔算係新消息，市場更關注佢哋明年嘅部署，到底明年繼續減產機會大唔大？
MAX Online亞太區業務總監杜浩霆認為，市場預期石油輸出國組織(OPEC)明年第1季都會減產，第4季已經過咗差唔多一半，歐洲及北美都未有傳出能源短缺嘅消息，加上美國近1至2個月嘅汽油需求係兩年半以來最少，同埋電動車愈來愈普及，相信汽油需求只會愈來愈少。
Perry又指，會唔會好快回復增產就取決於中國，作為全球最大需求國，若經濟好轉，油價有機會開始反彈，但相信中國經濟短期內反彈情況唔會太明顯，預期油價短線喺每桶80至81.5美元水平有支持，睇下可唔可以捕捉到高位沽返落嚟，向下就睇8月中低位，即78.5美元。
